កំលុងឆ្នាំ២០២២ ព្រះមុនីចរិយាវង្ស ហ៊ុន ខេមរា អ្នកសម្របសម្រួលការងារបោះពុម្ព និងផ្សព្វ​ផ្សាយស្នាដៃ “ញាណទស្សនៈ” ប្រែសម្រួលដោយព្រះភិក្ខុ ចិត្តគុត្តោ ង៉ាត ភាគ  បានស្នើសុំជំនួយផ្នែកបច្ចេកទេសទាក់ទងនឹងដំណើរការបោះពុម្ពផ្សាយពី អ្នកឧកញ៉ា បញ្ញាមេធាភិរ័ក្ខសិរី មហាឧបាសកពុទ្ធសាសនូបត្ថម្ភក៍  វេជ្ជបណ្ឌិត គួច ម៉េងលី ដែលជាចាងហ្វាងគ្រឹះស្ថានបោះពុម្ពនៃសាកលវិទ្យាល័យម៉េងលី ជេ. គួច ដើម្បីជួយសម្រួលដល់ដំណើរការបោះពុម្ព និង ផ្សព្វផ្សាយស្នាដៃខាងលើនេះជាធម្មទាន។

បន្ទាប់ពីចំណាយពេលមួយឆ្នាំពេញ ត្រួតពិនិត្យលើអក្ខរាវិរុទ្ធ និងបញ្ចូលទំព័រក្នុងកម្មវិធី Adobe InDesign គ្រឹះស្ថានបោះពុម្ពនៃសាកលវិទ្យាល័យ ម៉េងលី ជេ. គួច បានផ្តល់ជំនួយបច្ចេកទេសចប់ចុងចប់ដើម រហូតស្នាដៃដ៏មានន័យខ្លឹមសារនេះ អាចលេចចេញជារូបរាងឡើង។ ក្រោយស្នាដៃខាងលើបានចេញពីរោងពុម្ពហើយ ព្រះតេជៈគុណ ខេមរា បានផ្ញើស្នាដៃនេះ មកដល់គ្រឹះស្ថានបោះពុម្ពនៃសាកលវិទ្យាល័យ ម៉េងលី ជេ. គួច ចំនួន១០ ច្បាប់ ដើម្បីតម្កល់ទុកផងដែរ។

គួរបញ្ជាក់ផងដែរថា ស្នាដៃ “ញាណទស្សនៈ” ពុំមានលក់លើទីផ្សារនោះទេ ដ្បិតព្រះតេជៈគុណបានដឹកនាំបោះពុម្ពនិងផ្សព្វផ្សាយជាធម្មទានប៉ុណ្ណោះ។