លោក អឿ ស៊ីណា
                                  អ្នកនិពន្ធជាន់ខ្ពស់ II

លោក អឿ ស៊ីណា ចាប់កំណើតថ្ងៃ​ទី១៧ ខែមេសា ឆ្នាំ១៩៩២ ស្ថិតក្នុងភូមិកោះធំ ឃុំព្រៃគ្រី ស្រុកជលគិរី ខេត្តកំពង់ឆ្នាំង និងជាកូនច្បងក្នុងចំណោមបងប្អូន៦នាក់​។ ឪពុកឈ្មោះ អែល សំអុល ម្ដាយឈ្មោះ ទេស វន្នី មានមុខរបរនេសាទត្រី និងធ្វើស្រែចំការ។ នៅឆ្នាំ២០១១ លោក អឿ ស៊ីណា ​ទទួលបានសញ្ញាបត្រមធ្យមសិក្សាទុតិយភូមិ។ នៅឆ្នាំ២០១៥​ លោកបានបញ្ចប់ថ្នាក់បរិញ្ញាបត្រអក្សរសាស្រ្ដខ្មែរពីមហាវិទ្យាល័យសង្គមសាស្រ្ដ-មនុស្សសាស្រ្ដនៃសាកល​វិទ្យា​ល័យ​​ភូមិន្ទភ្នំពេញ។ លុះក្រោយមកទៀត នៅឆ្នាំ២០២១ ​លោកបានបញ្ចប់​ថ្នាក់បរិញ្ញាបត្រជាន់ខ្ពស់ជំនាញអក្សរ​សិល្ប៍​​​ដោយជោគជ័យពីសាកលវិទ្យាល័យភូមិន្ទភ្នំពេញ។

លោក ស៊ីណា បានចូលរួមជាមួយក្រុមការងាររៀបរៀងក្រងក្នុងគ្រឹះស្ថានបោះពុម្ពនៃសាកលវិទ្យាល័យ ម៉េងលី ជេ. គួច នៅឆ្នាំ២០១៦។ ទីនេះហើយ ជាកន្លែងដែលផ្តល់ឱកាសឱ្យលោកបានរៀនសូត្របន្ថែម លើជំនាញតែងនិពន្ធនិងរៀបរៀងស្នាដៃដើម្បីបោះពុម្ពផ្សាយ។​ ក្រៅពីចូលរួមក្នុងកិច្ចការចងក្រង លោក អឿ ស៊ីណា បានដាក់ស្នាដៃចូលរួមក្នុងគម្រោងចងក្រង កម្រងកំណាព្យ វេជ្ជបណ្ឌិត គួច ម៉េងលី និងខ្ញុំ និងបានផ្សាយស្នាដៃរួមគ្នាជាមួយអ្នកនិពន្ធដទៃទៀត ក្នុងសៀវភៅ កម្រងរឿងខ្លី ឧកញ៉ា វេជ្ជបណ្ឌិត គួច ម៉េងលី និមិត្ដរូបខ្ញុំ។ ​មិនតែប៉ុណ្ណោះ គាត់បាននិពន្ធសៀវភៅកំណាព្យមួយក្បាលទៀត ដែលមានចំណងជើងថា បេះឪដូងពុក បោះពុម្ពក្នុងឆ្នាំ២០២១​។ បន្ថែមពីលើនេះ ស្នាដៃនិពន្ធ​របស់លោកក៏ត្រូវបានគណៈកម្មការសមូហកម្មមន្តទឹកខ្មៅ ជ្រើសរើសយកទៅបោះពុម្ពផ្សាយ​រួមគ្នានៅក្នុងសមូហកម្មមន្តទឹកខ្មៅឆ្នាំ២០២១ ជំនាន់ទី៤  គឺរឿង ទីប្រឹក្សាព្រះឥន្ទ្រ។